Opnun reiðvegar

Fréttatilkynning frá hestamannafélaginu Andvara í Garðabæ. Þann 17. júlí s.l. var formlega opnaður nýr reiðvegur inn með Vífilsstaðahlíð sunnan akvegar. Það hefur verið mikið baráttumál hestamanna í Garðabæ að fá reiðveg á þessum slóðum staðfestann á skipulag, eða allt frá því að núgildandi aðalskipulag Garðabæjar 1995 - 2015 var fyrst kynnt. Áður notuðu hestamenn slóðann, þar sem nú er göngustígur, inn með Vífilsstaðahlíð, eða fram undir 1990 að borið var í slóðann og honum einungis ætluð gangandi umferð. Eftir þá aðgerð notuðust hestamenn við akveginn samhliða akandi umferð. Eftir að bundið slitlag var lagt á akveginn árið 2000 jókst hraði umferðar til muna og slysahætta samfara, við það var ekki unað. Það er loks árið 2002 sem reiðvegur er staðfestur á skipulag og framkvæmdaleyfi gefið út í febrúar árið 2003. Þá tók við fjármögnun verksins, en um er að ræða rúmlega 4. km. kafla. Hinn nýi reiðvegur tengir reiðveg meðfram Elliðavatnsvegi við reiðveg í Hjalladal skammt frá Búrfellsgjá. Vegagerðin er kostunaraðili að helmingi framkvæmdarinnar á móti hestamannafélaginu Andvara. Alls bárust sex tilboð í verkið, hagstæðasta tilboðið var frá Urð og Grjót ehf. og var því tekið, verktími var um fimm vikur. Allmargir mættu við opnunina og höfðu nokkrir sótt hesta úr hagbeit í tilefni dagsins. Jón Albert Sigurbjörnsson formaður LH klippti á borðann og u.þ.b. 25 manns riðu í Hjalladal í einstakri veðurblíðu, áð var stund áður en riðið var til baka og kaffi drukkið í félagsheimili Andvara. H.H.